''السيرة النبويه الشريفه(3)''
''السيرة النبويه الشريفه(3)''
" الحلقة الثالثة "
الحمد لله والصلاة والسلام علي رسول الله صلي الله عليه وسلم وبعد :-
تحدثنا في الحلقة الأولي عن مزايا السيرة النبوية وأهمية دراسة السيرة النبوية وفي الحلقة الثانية عن دلائل محبة المولي عز وجل للنبي صلي الله عليه وسلم في القرآن والحديث وكذلك محبة جبريل عليه السلام للنبي صلى الله عليه وسلم وكل ما سبق ما هو إلا مقدمة لنوضح من خلالها قيمة ومكانة السيرة النبوية ولذلك دعونا نبدأ في السيرة النبوية ؛ ولعل خير البدايات هي البداية بنسب النبي صلى الله عليه وسلم .
نسب النبي صلى الله عليه وسلم هو :-
(1) قال الإمام البخاري رحمه الله " هو أبو القاسم محمد بن عبد الله بن عبد المطلب بن هاشم بن عبد مناف بن قصي بن كلاب بن مرة بن كعب بن لؤي بن غالِب بن فِهْر بن مالِك بن النَّضْر بن كنانة بن خُزَيْمة بن مدركة بن إلياس بن مُضَر بن نِزَار بن معد بن عَدنان "
《أخرجه البخاري (3851) مناقب الأنصار/باب : مبعث النبي صلى الله عليه وسلم》
(أ) قال ابن حزم " وعدنان بلا شك من ولد إسماعيل الذبيح رسول الله بن إبراهيم خليل الله ورسوله صلي الله علي سيدنا محمد وعليهما وعلي جميع رسله وأنبيائه "
《جوامع الكلم لابن حزم ط.فيصل أباد باكستان : بتحقيق أحمد شاكر》
(ب) قال بن القيم بعد ذكر النسب إلي عدنان أيضا " إلي هنا معلوم الصحة ، ومتفق عليه بين النسابين ، ولا خلاف البتة ، وما فوق عدنان مختلف عليه ، ولا خلاف بينهم أن عدنان من ولد إسماعيل عليه السلام "
《زاد الميعاد ط.مؤسسة الرسالة》
(ج) قال الذهبي " وعدنان من ولد إسماعيل بن إبراهيم عليهما السلام بإجماع الناس ، لكن إختلفوا فيما بين عدنان وإسماعيل من الآباء "
《الذهبي في السيرة النبوية ص1》
( الشرح بالعامية )
تخيل معايا انك ماشي في الشارع وقابلك واحد ماسك مكرفون وبيصور بالكاميرا وقالك ان في جايزة قدرها 100.000 دولار ( 2 مليون 400 ألف جنيه ) مقابل انك تجاوب علي السؤال اللي هيقولوا .
تخيل كده شعورك هيبقي عامل إزاي ساعتها !! فلوس هتأمن بيها مستقبلك وحياتك مقابل إجابة سؤال والطبيعي ساعتها هتقولوا وانت نفسك مفتوحة اسأل وانا معاك فيسألك ويقولك : ما هو إسم النبي صلي الله عليه وسلم بالكامل ؟
الطبيعي انك هتقوله اسمه محمد بن عبد الله بن عبد المطلب وهتقف علي كده للأسف .
عارفين السبب في اننا مش عارفين اسم النبي بالكامل ايه ؟!
لاننا مش مهتمين بحياة النبي أصلا وكأنها مش موجودة في حياتنا من الأساس .
طب إيه هو إسم النبي بالكامل ؟!
عاوزك تبص علي رقم (1) 🔝☝
كل العلماء والأئمة والفقهاء متفقين علي رقم (1) وإن النبي صلى الله عليه وسلم إسمه بيبدأ من أبو القاسم لحد عدنان ومفيش أي خلاف عليه .
سؤال / هل معني كده ان في خلاف علي اسم النبي صلى الله عليه وسلم ؟!
أيوة في خلاف وده واضح في (ب) وواضح اكتر في (ج) بمعني أن الكل متفق علي اسم النبي لحد عدنان اما اللي بين عدنان وإسماعيل فيه اختلاف بين العلماء .
إذا العلماء متفقين علي نقطتين :
الأولى : ان اسم النبي يبدأ من أبو القاسم لحد عدنان .
الثانية : ان عدنان من أبناء سيدنا إسماعيل .
وإختلفوا في الأسماء اللي بين عدنان وإسماعيل اللي هما أبناء سيدنا إسماعيل وآباء عدنان .
واللي يلخص الكلام ده كله كلام الإمام الذهبي " وعدنان من ولد إسماعيل بن إبراهيم عليهما السلام بإجماع الناس ، لكن إختلفوا فيما بين عدنان وإسماعيل من الآباء " .
سؤال كمان / ليه ربنا سبحانه وتعالي اختار النسب ده للنبي صلي الله عليه وسلم ؟!
لازم تعرف ان ربنا سبحانه وتعالي اختار أطهر وأحسن وأفضل نسب علي وجه الأرض للنبي صلي الله عليه وسلم عشان اما يدعو الناس للإسلام محدش يطعن في نسبه او نسبه يكون نقطة ضعف ليه .
مثال بسيط : انت لو بتكلم واحد وتنصحه يبعد عن الغلط ويمشي في الطريق الصح ، ممكن ساعتها يقولك انت نسيت نفسك ، انت نسيت ابوك كان وانت كنت ايه ، ويجبلك تاريخك كله .
عشان كده ربنا سبحانه وتعالي اختار النسب ده للنبي صلى الله عليه وسلم .
سؤال كمان / إيه دليلك علي الكلام اللي بتقوله ده ؟!
روى الطبراني في الأوسط وابن عدي وغيرهما عن علي بن أبي طالب رضي الله عنه أن النبي صلى الله عليه وسلم قال " خرجت من نكاح ولم أخرج من سفاح من لدن آدم إلى أن ولدني أبي وأمي لم يصبني من سفاح الجاهلية شيء " وقد حسن الحديث الألباني في صحيح الجامع .
اذا كنت من الناس اللي عندها أهل كويسين والناس كلها بتتكلم عن أخلاقهم وأدبهم ده أمر يخليك تفرح لأن ده نعمة من ربنا سبحانه وتعالي عليك عشان كده حاول تخلي تاريخك نضيف مفيهوش اخطاء ليه ؟! لأن الإنسان الصالح بأخلاقه وبأهله بيبقي عنده حاجة اسمها قوة مجتمعية بمعني أن الناس كلها عارفة عنه الطيبة والأخلاق والأدب والإحترام اللي ورثهم عن ابوه واجداده " وَكَانَ أَبُوهُمَا صَالِحًا " يعني صلاح من الاب والأجداد ، عشان كده حاول متغلطش ، حاول تخلي صورتك قدام الناس كويسة .
سؤال / معني كده ان في إنسان مبيغلطش خالص او إننا مينفعش نغلط او نعمل ذنب ؟!
روي الترمذي وابن ماجه والدارمي وأحمد عن أنس بن مالك رضي الله عنه قال : قال رسول الله صلى الله عليه وسلم " كلُّ بني آدم خَطَّاء ٌ، وخيرُ الخَطَّائِينَ التوابون " .
كل واحد فينا غلط قبل كده وبيغلط دلوقتي وهيغلط طول ما هو عايش وده مش بمزاجه بالعكس دي الفطرة اللي ربنا خلقه عليها انه يغلط ويذنب بس مش يتمادي فيه .
يطلع واحد ويقولك انا كده بقي اغلط براحتي واعمل اللي أنا عاوزه !
افكره بمقولة أحد العلماء " ليس الخطأ عيباً في ذاته ، و لكن الرضا به و الاستمرار عليه و الدفاع عنه هو الخطأ كل الخطأ " بمعني انك لو غلطت مش عيب لأن دي طبيعتك وفطرتك اللي ربنا خلقك عليها بس الغلط فعلا انك ترضي بيه وتدافع عنه بكل الطرق بمعنى اني اكون عارف انه غلط بس بعمله ومستمر فيه وبدافع عنه لو حد نصحني والحالة دي نسميها " الجهر بالمعصية " والناس اللي بتجهر بالمعصية النبي صلى الله عليه وسلم قال عنهم في الصحيحين من حديث أبي هريرة ـ رضي الله عنه ـ أن النبي صلى الله عليه وسلم قال " كل أمتي معافى إلا المجاهرين ، وإن من المجاهرة أن يعمل الرجل بالليل عملا ً، ثم يصبح وقد ستره الله عليه فيقول : يا فلان عملت البارحة كذا كذا ، وقد بات يستره ربه ويصبح يكشف ستر الله عنه " .
سؤال / ليه مينفعش اجهر بالمعصية ؟!
لأن الإنسان اما يذنب أو يغلط وبعد كده يتوب ربنا بيقبل توبته اما الناس !! عمرها ما بتنسي وبتفضل فاكره مهما حصل فإذا كانت المعصية عند الله تمحي فإنها عند الناس تبقي ، عشان كده متجهرش بالمعصية ؛ وكمان تعالي شوف الحديث ده كده أخرج الحاكم من حديث ابن عمر ـ رضي الله عنهما ـ عن النبي صلى الله عليه وسلم قال : اجتنبوا هذه القاذورات التي نهى الله عنها ، فمن ألم بشيء منها فليستتر بستر الله تعالى ، وليتب إلى الله تعالى ، فإنه من يبد لنا صفحته نقم عليه كتاب الله " وأخرجه مالك في الموطإ مرسلا عن زيد بن أسلم.
طب تعالي كده نشوف الحديث اللي في صحيح مسلم ورواه أنس بن مالك مُرَّ بجَنَازَةٍ فَأُثْنِيَ عَلَيْهَا خَيْرًا ، فَقالَ نَبِيُّ اللهِ صَلَّى اللَّهُ عليه وَسَلَّم َ: وَجَبَتْ وَجَبَت وَجَبَت ْ، وَمُرَّ بجَنَازَةٍ فَأُثْنِيَ عَلَيْهَا شَرًّا ، فَقالَ نَبِيُّ اللهِ صَلَّى اللَّهُ عليه وَسَلَّم َ: وَجَبَتْ وَجَبَتْ وَجَبَت ْ، قالَ عُمَرُ : فِدًى لكَ أَبِي وَأُمِّي، مُرَّ بجَنَازَة ٍ فَأُثْنِيَ عَلَيْهَا خَيْر ٌ، فَقُلْتَ: وَجَبَتْ وَجَبَت وَجَبَتْ ، وَمُرَّ بجَنَازَةٍ فَأُثْنِيَ عَلَيْهَا شَر ٌّ فَقُلْتَ: وَجَبَتْ وَجَبَتْ وَجَبَتْ ؟ فَقالَ رَسولُ اللهِ صَلَّى اللَّهُ عليه وَسَلَّمَ " مَن أَثْنَيْتُمْ عليه خَيْرًا وَجَبَتْ له الجَنَّة ُ، وَمَن أَثْنَيْتُمْ عليه شَرًّا وَجَبَتْ له النَّارُ ، أَنْتُمْ شُهَدَاءُ اللهِ في الأرْضِ، أَنْتُمْ شُهَدَاءُ اللهِ في الأرْضِ، أَنْتُمْ شُهَدَاءُ اللهِ في الأرْضِ " .
تخيل كده الموقف معايا ، بعد اما تموت الناس وتيجي سيرتك الناس هتقول ايه ؟!
بلاش كده تتمني الناس تقول ايه ؟! عاوزهم يقولوا الله يرحمه كان راجل محترم ومؤدب وخلوق ، مكنش بيسيب فرض والناس كلها بتحبه واللي يشوفه يرتاحله ويطمن ويقعد يدعيلك ؛ ولا عاوز يتقال عنك الله يجحمه ، كويس ان احنا خلصنا منه ده كان ظالم ومفتري متجبش سيرته يا عم الحمد لله اننا استريحنا منه .
طب تعالي كده نشوف بيت شعر جميل اوى من أمير الشعراء أحمد شوقي
" دقات قلب المرء قائلةً له
إن الحياةَ دقائقٌ وثواني
فارفع لنفسك بعد موتك ذِكرها
فالذِكرُ للإنسان .. عُمرٌ ثاني ! "
انك ممكن تعيش مرتين ؛ ازاي ؟!
حياتك الأولي اللي انت موجود فيها بجسمك اما التانية بروحك وسمعتك وعملك اللي انت سيبته قبل ما تموت ومتنساش الحديث ده عَنْ أَبِي هُرَيْرَةَ رضي الله تعالى عنه: أَنَّ رَسُولَ اللَّهِ ﷺ قَال َ" إِذَا مَاتَ ابنُ آدم انْقَطَعَ عَنْهُ عَمَلُهُ إِلَّا مِنْ ثَلَاث ٍ: صَدَقَةٍ جَارِيَة ٍ، أو عِلْمٍ يُنْتَفَعُ بِه ِ، أَوْ وَلَدٍ صَالِحٍ يَدْعُو لَهُ" رَوَاهُ مُسْلِمٌ .
كتب/ أحمد محمود
تعليقات
إرسال تعليق