''السيرة النبويه الشريفه(5)''

''السيرة النبويه الشريفه(5)''

" الحلقة الخامسة "

الحمد لله والصلاة والسلام علي رسول الله صلي الله عليه وسلم وبعد :-

تحدثنا في الحلقات السابقة عن مزايا السيرة النبوية وأهمية دراسة السيرة النبوية ودلائل محبة المولي عز وجل للنبي صلي الله عليه وسلم في القرآن والحديث وكذلك محبة جبريل عليه السلام للنبي صلى الله عليه وسلم وبدأنا بذكر نسب النبي صلى الله عليه وسلم وكنيته واليوم نتحدث عن أبناء النبي صلي الله عليه وسلم الذكور والإناث .

أولا : الذكور :-

قال النووي رحمه الله " كان له صلي الله عليه وسلم ثلاثة بنين : القاسم وبه كان يكني ، ولد قبل النبوة ، وتوفي وهو ابن سنتين ، وعبد الله وسمي الطيب الطاهر ، لأنه ولد بعد النبوة ، وقيل : الطيب والطاهر غير عبد الله .

( رجحه بن حزم في جوامع السيرة )

والثالث : إبراهيم ولد بالمدينة سنة ثمان ، ومات بها سنة عشر وهو ابن سبعة عشر شهرا أو ثمانية عشر .

ثانيا : الإناث :-

أنجب النبي صلى الله عليه وسلم أربعة بنات هن " زينب ، فاطمة ، رقية ، أم كلثوم "

( الشرح بالعامية )

تخيل واحد بيسألك ويقولك انت بتحب النبي صلي الله عليه وسلم ؟!

طبعا هتقوله اكيد هو مين مبيحبش النبي ؛ فيسألك سؤال تاني ويقولك تعرف أبناء النبي ؟! وعشان محدش يحرجك بالسؤال تعالي أقولك انا علي أبناء النبي صلي الله عليه وسلم .

أولا تعالي نشوف قول قتادة " تزوج النبي خمس عشر مرة ، فدخل بثلاث عشرة ، وجمع بين إحدي عشرة ، وتوفي عن تسع "

( تهذيب الأسماء واللغات )

النبي صلي الله عليه وسلم تزوج 15 مرة ومش هندخل في تفاصيل زواجه دلوقتي المهم ان النبي صلي الله عليه وسلم لم ينجب إلا من السيدة خديجة ومارية القبطية .

كل أبناء النبي صلى الله عليه وسلم الذكور والإناث كانوا من السيدة خديجة إلا ابرهيم من السيدة مارية القبطية .

سؤال / هما مين أبناء النبي واسماؤهم ايه ؟

الذكور : القاسم وعبد الله وإبراهيم

الإناث : زينب وفاطمة ورقية وام كلثوم 

كل أبناء النبي ماتوا وهو عايش ما عدا فاطمة بعده ب6 شهور .

القاسم اتولد قبل النبوة ومات عنده سنتين .

عبد الله اتولد بعد النبوة وكان اسمه الطيب الطاهر .

إبراهيم اتولد في المدينة سنة 8ه ومات سنة 10ه وعمره كان 17 شهر او 18 شهر يعني تقدر تقول سنة ونص .

زينب اتجوزت أبو العاص بن الربيع اللي هو بن خالتها هالة بنت خويلد .

فاطمة اتجوزت علي بن أبي طالب .

رقية وأم كلثوم اتجوزوا عثمان بن عفان ، الأول اتجوز رقية وبعد كده ام كلثوم وفي روايات بتقول ان ام كلثوم ماتت سنة 9ه شهر شعبان .

سؤال / هو النبي صلى الله عليه وسلم دفن ولاده كده بسهولة من غير ما يبكي ويحزن ؟!

تعالوا نشوف المواقف اللي بكي وحزن فيها النبي صلي الله عليه وسلم .

أولا : بكاؤه عند فراق الأحباب :-

(1) وفاة أمه آمنة بنت وهب اللي ماتت وهي راجعة بالنبي صلي الله عليه وسلم من عند اخواله في منطقة اسمها الأبواء .

(2) في عام الحزن اما عمه أبو طالب وزوجته السيدة خديجة ماتوا وساعتها الكفار لقوا الفرصة أنهم يأذوه .

(3) بعد غزوة بدر اما رجع المدينة وعرف ان بنته رقية ماتت بعد صراع مع المرض .

(4) لحظة وفاة بنته ام كلثوم بعد صراع مع المرض هي الاخري .

(5) في وفاة عمه حمزة بن عبد المطلب في غزوة أحد .

(6) في وفاة سعد بن معاذ في غزوة الخندق بعد اما الجرح زاد في جسمه ومات .

(7) علي زيد بن حارثة وجعفر بن أبي طالب و عبد الله بن رواحة اللي ماتوا فب سرية مؤتة .

ثانيا : بكاؤه عند هجر الأوطان :-

لحظة خروجه من مكة إلي المدينة اما قال " والله إنك لأحب بلاد الله إلي الله وإنك لأحب بلاد الله إلي رسول الله ولولا أن قومي أخرجوني منك ما خرجت " .

ثالثا : بكاؤه من خشية الله جل وعلا :-

روي مسلم في كتاب الصيام قوله صلي الله عليه وسلم " والله إني لأرجو أن أكون أخشاكم لله وأعلمكم بما أتقي " .

إذن الحزن والبكاء مش للبنات بس بالعكس الرجالة ممكن تبكي وده مش دليل علي ضعفهم بالعكس ده دليل ان عندهم احساس وشعور لأن البكاء ده شعور إنساني عند أي حد ، عشان كده لو وصلتك مصيبة او مشكلة لازم تعرف :

(1) ان اللي حصلك مش ممكن حد يغيره او يبعده عنك .

(2) ان اللي بعد عنك مش ممكن يوصلك .

(3) ان ده خير من ربنا سبحانه وتعالي .

(4) وتستقبله بأنك ترضي وتحمد ربنا عليه .

ونكمل المرة الجاية ان شاء الله ...